«Liverpul» klubining sobiq ustozi Yurgen Klopp Madridning «Real» klubini boshqarmaydigan bo‘ldi. Tomonlarning hamkorlik bo‘yicha olib borgan muzokaralari boshi berk ko‘chaga kirib qoldi. Ehtimoliy tayinlov amalga oshmaydigan bo‘ldi. Bu haqda Cadena SER nashri xabar bermoqda.
Manba bergan ma’lumotlarga ko‘ra, yakunda «Real» amalga oshirish osonroq bo‘lgan variantga e’tibor qaratadi. «Qaymoqranglilar» vaqt yo‘qotib, bir necha oy davomida Kloppni ko‘ndirish niyatida emaslar. Madridliklar «qog‘ozda» unchalik ideal ko‘rinmasa-da, tayinlovini qisqa muddatda tashkil qilish mumkin bo‘lgan nomzodni tanlashga tayyor.
Avvalroq OAV «Real» bosh murabbiyligiga Joze Mourinyo, Maurisio Pochettino va Lionel Skaloni nomzodlarini bog‘layotgan edi.
