Ushbu jamoalar kuchlilar safida bugungacha 24 marta to‘qnash kelgan bo‘lib, ustunlik “Metallurg” jamoasi tomonida. Bekobodliklar 10 uchrashuvda g‘alaba qozongan, 8 o‘yinda kuchlar teng kelgan, 6 bahsda termizliklar zafar quchgan. Kiritilgan va o‘tkazib yuborilgan to‘plar farqi “Metallurg” foydasiga – 25:20.

Termizda kechgan bahslarda esa vohaliklar ustunlikka ega. 12 ta o‘yinning 4 tasida “Surxon” g‘alaba qozongan, 6 ta bahsda durang natija qayd etilgan, 2 tasida bekobodliklar yutuqqa erishgan. To‘plar nisbati – 15:10, termizliklar foydasiga.

“Surxon”ning o‘zaro o‘yinlardagi eng yirik g‘alabasi – 4:0, “Metallurg”niki – 3:0. O‘tgan mavsum “Surxon” “Metallurg”ni uyda ham, safarda ham 1:0 hisobida yutgandi.

“Surxon” maydonida o‘tkazilgan so‘nggi beshta uchrashuvda qayd etilgan natijalar:

20.05.2023  “Surxon” – “Metallurg” – 1:0
18.08.2022  “Surxon” – “Metallurg” – 1:2
11.03.2021  “Surxon” – “Metallurg” – 1:0
25.08.2020  “Surxon” – “Metallurg” – 1:2
10.03.2019  “Surxon” – “Metallurg” – 1:1

“Surxon” haqida

“Surxon” jamoasiga 1968 yilda asos solingan. Dastlabki yili “Chegarachi” nomi bilan qatnashgan klub keyingi to‘rtta mavsumda “Avtomobilist” nomini oldi. 1974 yilgi musobaqada “Spartak” nomida qatnashgan termizliklar keyin yana to‘qqiz mavsum – 1975-1983 yillar davomida “Avtomobilist” nomiga murojaat etishgan. 1984-1993 yillarda “Surxon”, 1994-1996 yillarda ASK, 1997-2008 yillarda “Surxon”, 2009-2010 yillarda “Dinamo-Hisor”, 2010-2011 yillarda “Termiz” nomlari ostida musobaqalarda ishtirok etib keldi. 2012 yildan jamoa yana o‘zining qadrdon nomi – “Surxon”ni tikladi va bugungi kunga qadar ushbu nom ostida o‘ynab kelmoqda.

Jamoa kuchlilar safida bugunga qadar roppa rosa 515 ta o‘yin o‘tkazdi. Janubliklar shulardan 151 tasida g‘alaba qozongan, 98 ta o‘yinda durang o‘ynagan, 266 ta uchrashuvda imkoniyatni boy bergan. To‘plar farqi – 587:929.

“Surxon”ning elitadagi eng yirik g‘alabasi – 8:0 (“Afrosiyob”, 1997 yil), eng yirik mag‘lubiyati – 0:10 (“So‘g‘diyona”, 1992).