Adriyen Rabyo Kilian Mbappening jarohati bilan bog‘liq vaziyat haqida gapirdi.
Eslatib o‘tamiz, fransiyalik hujumchi dushanba kuni Avstriya terma jamoasiga qarshi Yevropa chempionati 1-tur uchrashuvida (1:0) burnini sindirib olgandi. Kecha u mashg‘ulotlarga qaytgani ma’lum bo‘ldi. Ertaga fransuzlar Niderlandiyaga qarshi maydonga tushadi.
“Burunning sinishi dunyoning oxiri emas. Kilian tez orada biz bilan bo‘lishi kerak.
Kiliansiz o‘ynash qiyin bo‘lishi mumkin. U juda muhim jamoadoshimiz va sardorimiz, shuning uchun bu nafaqat bizga, balki raqiblarga ham ta’sir qiladi - ular o‘yinga boshqacha tayyorgarlik ko‘rishlari kerak bo‘ladi.
Yashirmayman, biz uning o‘ynashini albatta xohlaymiz. Ammo zaxira o‘rindig‘idagi o‘yinchilarga qarab, menimcha, Kilianni almashtirish uchun bizda yetarli resurslar bor.
Usiz biroz qiyinroq bo‘ladi, lekin men jamoamizdagi barcha buyuk futbolchilarga ishonaman”, dedi fransiyalik yarim himoyachi chorshanba kuni bo‘lib o‘tgan matbuot anjumanida.
