Bundan roppa-rosa 38 yil avval, 1986-yilning 22-iyun kuni jahon chempionati doirasida Argentina va Angliya terma jamoalari o‘rtasida o‘yin bo‘lib o‘tgandi.
O‘sha kuni Mexiko shahridagi "Astek" stadionida tomoshabinlar bir vaqtning o‘zida ikkita golni ko‘rishdi va ularni haligacha eslashadi.
Ikkala golga ham afsonaviy Diyego Maradona mualliflik qildi. Avvaliga Maradona “xudoning qo‘llari” yordamida gol urdi. Argentina terma jamoasi yetakchisi to‘pni qo‘li bilan darvozaga yo‘llaganini hakam payqamadi.
O‘yindan so‘ng Maradona agar qo‘l bo‘lsa, bu faqat Xudoning qo‘li bo‘lishi mumkinligini aytdi. Bir necha daqiqadan so‘ng Maradona keyinchalik "asr goli" deb atalgan golni urdi.
Diyego Angliya jamoasining yarmini aldab o‘tib, to‘pni darvozaga yo‘lladi. “Albiseleste” 2:1 hisobida zafar quchdi.
Keyinchalik argentinaliklar finalda G‘arbiy Germaniya terma jamoasini 3:2 hisobida mag‘lub etib, o‘sha mundialni qo‘lga kiritdi.
Diyego Maradona 2020-yilning 25-noyabrida vafot etdi.
