Бундан роппа-роса 38 йил аввал, 1986-йилнинг 22-июнь куни жаҳон чемпионати доирасида Аргентина ва Англия терма жамоалари ўртасида ўйин бўлиб ўтганди.
Ўша куни Мехико шаҳридаги "Астек" стадионида томошабинлар бир вақтнинг ўзида иккита голни кўришди ва уларни ҳалигача эслашади.
Иккала голга ҳам афсонавий Диего Марадона муаллифлик қилди. Аввалига Марадона “худонинг қўллари” ёрдамида гол урди. Аргентина терма жамоаси етакчиси тўпни қўли билан дарвозага йўллаганини ҳакам пайқамади.
Ўйиндан сўнг Марадона агар қўл бўлса, бу фақат Худонинг қўли бўлиши мумкинлигини айтди. Бир неча дақиқадан сўнг Марадона кейинчалик "аср голи" деб аталган голни урди.
Диего Англия жамоасининг ярмини алдаб ўтиб, тўпни дарвозага йўллади. “Альбиселесте” 2:1 ҳисобида зафар қучди.
Кейинчалик аргентиналиклар финалда Ғарбий Германия терма жамоасини 3:2 ҳисобида мағлуб этиб, ўша мундиални қўлга киритди.
Диего Марадона 2020-йилнинг 25-ноябрида вафот этди.
