Germaniya terma jamoasi bosh murabbiyi Yulian Nagelsmann Yevropa chempionati-2024 pley-off bosqichi arafasida o‘z fikrlarini bildirib o‘tdi. Mutaxassisning fikricha, guruh bosqichining Shveysariya bilan so‘nggi o‘yini (1:1) pley-off o‘yinlari oldidan ajoyib sinov bo‘ldi.
"Shveysariyaga qarshi o‘tgan o‘yinda juda ko‘p tavakkal qildik. Bu muhim o‘yinlar oldidan juda yaxshi sinov bo‘ldi va biz o‘yinga qanday qaytishni bilamiz. Jamoamizda o‘zgacha ruh bor. Biz uni qo‘llab-quvvatlashimiz kerak, chunki u natijaga katta ta’sir ko‘rsatishi mumkin. Katta turnirlar qonuni shundaki, har bir bosqichda raqiblar qiyinlashib boraveradi" - dedi Nagelsmann matbuot anjumanida.
Eslatib o‘tamiz, Germaniya guruhdan birinchi o‘rinda chiqdi. 1/8 finalda nemislar Daniya terma jamoasi bilan uchrashadi.
