Mashhur «Lids» mavsum finishida Chempionship turnir jadvalida 3-o‘rinni band etdi.

Vaqtida APLda ham grandlarni qiynab qo‘yishi bilan muxlislar mehrini qozongan jamoa 46ta o‘yinda 90 ochko jamg‘ardi. «Tovuslar» keyinchalik APLga chiqish huquqini beruvchi «pley-off» bosqichi finalida «Sautgempton»ga 0:1 hisobida yutqazib, kelasi mavsum ham Chempionshipda qoladigan bo‘lishdi.

«Lids»ning natijasi shunisi bilan alamliki, oxirgi 26 yil badaliga Chempionshipda 90ta yoki ko‘proq ochko to‘plagan biror jamoa APL yo‘llanmasidan quruq qolmagandi. Angliya futbolida bunaqasi oxirgi marta mavsum-1997|1998da kuzatilgandi. O‘shanda «Sanderlend» ikkinchi darajali liga o‘yinlarida aynan 90 ochko ishlab, yakunda 3-o‘rinni egallagandi.

O‘xshash tomoni, «Sanderlend» ham xuddi «Lids» kabi «pley-off» bosqichi finaliga chiqqan, ammo yakunda... Xullas, «Charlton»ga qarshi kechgan hal qiluvchi o‘yin «qora mushuklar» uchun o‘ta alamli xotima topgandi. Ya’ni tomonlar asosiy vaqtda 4tadan gol urishgan. 4:4 - final uchun noyob hisob. Penaltilar seriyasida esa omad «Sanderlend»dan yuz o‘girgan - 6:7. Mana, «Lids» 26 yillik tanaffusdan keyin «qora mushuklar» tushgan holatni o‘zida sinab ko‘rdi. Taqqoslash uchun, yakunda APLda o‘ynash huquqini bergan uchinchi yo‘llanmaga ega chiqqan «Sautgempton» ligada 87 ochko bilan 4-o‘rinni egallagandi. Chempionshipning o‘ziga xos tomonlaridan biri ham shu - ba’zan 3 va 4-o‘rinlar o‘z ahamiyatini butkul yo‘qotishi mumkin...