"Lasio" "Manchester Yunayted" bilan hujumchi Meyson Grinvud borasida muzokaralarni davom ettirmoqda.

Angliyalik futbolchi faoliyatini Rimda davom ettirishga tayyor, biroq "Lasio" "Manchester Yunayted" bilan transfer borasida hali kelisha olmayapti. Jurnalist Alfredo Pedullaning so‘zlariga ko‘ra, italyan klubi Grinvud uchun taxminan 22 million funt sterling (26 million yevro) taklif qiladi, shuningdek, shartnomada "qizil iblislar"ga kelajakdagi taxminiy sotuv summasining 40-50 foizini berish imkonini beruvchi bandni ham kiritadi. "Burgutlar" rahbariyati bunday shartlar mankunianliklarni qanoatlantirishi kerak, deb hisoblamoqda.

O‘tgan mavsumda Meyson Grinvud "Xetafe"da ijara asosida o‘ynadi. Avvalroq "Manchester Yunayted" futbolchi uchun 35 million yevrodan ko‘proq so‘ragani xabar qilingandi.