Bugun “Qo‘qon-1912” jamoasida yig‘ilish bo‘lib o‘tdi. Unda bir qator tashkiliy masalalar ko‘rib chiqildi.
Yig‘ishda jamoada katta murabbiy sifatida faoliyat olib borgan Bahrom Haydarov bosh murabbiy etib tayinlandi.
Endilikda unga “Lokomotiv” klubi yoshlar jamoasida faoliyat olib borgan Aripov Rustam Abdurasulovich yordam beradi. Rustam Aripov Bahrom Haydarov bilan “Surxon” jamoasida ham birgalikda faoliyat olib borgani qayd o‘tish lozim. Shuningdek, Rahmatjon Inog‘omov ham murabbiylar shtabida faoliyatini davom ettiradi. Xurshid Xo‘jayev esa bundan buyog‘iga darvozabonlar bilan ishlaydigan bo‘ldi.
Shu vaqtga qadar jamoada faoliyat olib borgan jamoa bosh murabbiyi Muhsin Nizomiddinov, darvozabonlar murabbiyi Andrey Baklanov va sport direktori Abduvahob Ahmadaliyev bilan do‘stona xayrlashildi.
"Yuqorida nomi keltirilgan mutaxassislarga jamoamizdagi faoliyatlari uchun katta minnatdorlik bildiramiz. Bahrom Haydarovga mavsumning qolgan qismida ulkan zafarlar tilaymiz va bosh murabbiyimiz boshchiligida oldimizga qo‘yilgan vazifani bajarishimizga ishonamiz." - deyiladi qo‘qonliklarning rasmiy bayonotida.
