Parij-2024 yozgi Olimpiya o‘yinlarining rasman start olishiga roppa-rosa 10 kun qoldi.
Poytaxtimizdagi Olimpiya va Paralimpiya shon-shuhrati muzeyida O‘zbekiston delegasiyasining mazkur Olimpiadadagi ishtiroki oldidan matbuot anjumani tashkil etildi.
Tadbirda Sport vaziri Adham Ikramov, MOQ Bosh kotibi Oybek Kasimov, Qo‘mita raisi o‘rinbosarlari Ravshan Irmatov, Saken Polatov, Azizjon Kamilov va Sherzod Tashmatov, shuningdek, OAV xodimlari ishtirok etishdi.
Vazir anjumanni ochib berar ekan, 3-yil davom etgan siklda Prezidentimiz va davlatimiz tomonidan terma jamoalarimizning tayyorgarligi uchun barcha sharoitlar munosib tarzda yaratib berilgani, bunga javoban o‘zbek sporti tarixida ilk bor 19 sport turida 90 nafar atlet bilan 75 ta yo‘llanma qo‘lga kiritilganini, qolaversa, delegasiyamiz futbol, ayollar kurashi, suvga sakrash va kamondan otish dasturlarida debyut qilishini bildirdi.
MOQ Bosh kotibi sport federasiya va assosiasiyalari bilan hamkorlikda ulkan ish olib borilgani, buning natijasida tayyorgarlik sikli yuqori ko‘rsatkichlar bilan yakunlangani haqida to‘xtaldi. Shuningdek, Oybek Omilovich Xalqaro Olimpiya qo‘mitasi va O‘yinlarning tashkiliy qo‘mitasi bilan muntazam ravishda aloqa yo‘lga yo‘lga qo‘yilgani, delegasiya a’zolari, sportchi va murabbiylar uchun barcha sharoitlar yaratib berilishini qo‘shimcha qildi.
O‘z navbatida, Ravshan Irmatov futbolchilarimizning tayyorgarligi, rejalar xususida batafsil gapirib o‘tdi. Shuningdek, Saken Polatov boks, Azizjon Kamilov dzyudo misolida sportchilarimizning tayyorgarligi yakuniy pallaga kirgani, barcha jamoalarimizdan yuqori natijalar kutilayotgani xususida gapirib o‘tishdi.
Anjuman davomida jurnalistlar delegasiya oldiga qo‘yilgan vazifa, sportchilarimizning bugungi kundagi holati, bo‘lajak bahslarda faoliyat olib boradigan o‘zbekistonlik hakamlar va boshqa yo‘nalishlar bo‘yicha o‘zlarini qiziqtirgan savollarga atroflicha javob olishdi.
Bugun Ishchi guruhining dastlabki qismi Fransiyaga poytaxtiga yo‘l oldi. Asosiy delegasiya 23-iyul sanasida Parijga jo‘nab ketishi rejalashtirilgan.
