O‘zbekistonlik yana bir dzyudochi o‘z faoliyatini yakunlaganini e’lon qildi.

Avvalroq o‘zining uchinchi Olimpiadasida ishtirok etgan Gulnoza Matniyazova o‘z faoliyati yakuniga yetganini e’lon qilgan edi.

Kuni kecha yana bir tajribali sportchi Sharofiddin Boltaboyev ham Parijdagi musobaqa faoliyatidagi eng so‘nggisi bo‘lishini aytdi.

"Parij Olimpiadasini ham tugatdim. Hozirda juda ham og‘ir kunlarni, stressni boshimdan o‘tkazyapman, sababi 25 yillik mehnatlarim va orzularimdan voz kechyapman! 4 yoshimda shu sportni boshlaganman.

Har bir ishimda faqat shu sport bilan bo‘lganman, bir kun ham tashlab ketmaganman. 11 yil uzluksiz terma jamoada yurtim uchun tatamiga chiqdim. Hech qachon yurtimni or nomusini sotmadim! Men uchun, to‘g‘risi juda ham og‘ir qarorni qabul qildim. Shu to‘g‘ri tanlov deb o‘ylayman va meni qarorimni hurmat bilan, to‘g‘ri tushunasizlar degan umiddaman.

Men o‘z sport faoliyatimni yakunladim, hammasi uchun sizlarga katta rahmat. Sizlarni bir xafa qildim, bir xursand qildim, rozi bo‘lasizlar. Olimpiada medalini olib kelaman deb harakat qildim, lekin taqdirimga yozilmagan ekan. Alloh eng yaxshisini bilguvchi.

Men 29 yoshga to‘ldim. O‘zimga mos ish nasib qilishiga ishonaman. Sog‘-salomat bo‘linglar", deb yozdi Boltaboyev.

Sharofiddin Boltaboyev bir necha bor “Katta dubulg‘a” va Gran-pri turkumidagi musobaqalarning g‘olib va sovrindori, uch karra Osiyo chempionati sovrindori hisoblanadi.