Mircha Luchesku Ruminiya terma jamoasini boshqaradi.
Ruminiya futbol federasiyasi bugun o‘tkazilgan matbuot anjumanida 79 yoshli mutaxassis terma jamoaga bosh murabbiy etib tayinlanganini ma’lum qildi.
Tomonlar ikki yillik shartnoma tuzdilar. Lucheskuning asosiy maqsadi 2026 yilgi jahon chempionatiga chiqish bo‘ladi.
"Sog‘indingizmi? Biz bu ajoyib hikoyani birgalikda davom ettiramiz.
Ko‘p his-tuyg‘ular, birinchi navbatda, nostalgiya meni bosib oldi. Kecha biz uch soatcha futbol haqida gaplashdik. Ular menga shartnoma taklif qilishadi, deb o‘ylamagandim. To‘g‘risini aytsam, menga taklif bo‘lishini xohlamadim, chunki men yosh murabbiylar kelishini xohlardim.
Edi Iordanesku ixcham, muvozanatli jamoa tuzdi va o‘z ishini davom ettirish unga bog‘liq edi, biroq, tushunishimcha, u buni xohlamagan. Men unga Georgi Xadji bilan gaplashishni maslahat berdim, chunki u terma jamoani yaxshi ko‘radi.
Boshqa tanlovimiz yo‘qligi sababli, men qaytib kelishim va shu vaqt ichida o‘rganganlarimni taklif qilishim kerak. Bilaman, qiyin bo‘ladi, lekin o‘yinchilar avlodiga ishonaman, bu g‘olib jamoa. Belgiya va Niderlandiyaga qarshi o‘yinlarda sodir bo‘lgan voqealar futbolchilarda tajriba yetishmayotganiga yaqqol dalil bo‘ldi. Bu sezilarli darajada o‘sishi mumkin bo‘lgan o‘yinchilar guruhi.
Menga pul kerak emas, qandaydir imidj yaratish, boshimdan kechirgan ajoyib lahzalar meni terma jamoada ishlashga undadi. Mening qarorimga faqat futbolga bo‘lgan muhabbatim sabab bo‘lgan. Jahon chempionatida muvaffaqiyatli ishtirok etish uchun hamma narsani qilaman.
Xotinim menga bu ishni olmaslikni aytdi. O‘g‘il Razvan menga o‘zim to‘g‘ri deb hisoblagan va his qilgan narsani qilishimni aytdi. Menga qiziqish paydo bo‘ldi, chunki bu oson bo‘lmaydi", - dedi Luchesku.
"Zenit" va "Shaxtyor"ning sobiq murabbiyi Ruminiya terma jamoasini 1981 yildan 1986 yilgacha boshqargan.
