Мирча Луческу Руминия терма жамоасини бошқаради.

Руминия футбол федерасияси бугун ўтказилган матбуот анжуманида 79 ёшли мутахассис терма жамоага бош мураббий этиб тайинланганини маълум қилди.

Томонлар икки йиллик шартнома туздилар. Луческунинг асосий мақсади 2026 йилги жаҳон чемпионатига чиқиш бўлади.

"Соғиндингизми? Биз бу ажойиб ҳикояни биргаликда давом эттирамиз.

Кўп ҳис-туйғулар, биринчи навбатда, ностальгия мени босиб олди. Кеча биз уч соатча футбол ҳақида гаплашдик. Улар менга шартнома таклиф қилишади, деб ўйламагандим. Тўғрисини айтсам, менга таклиф бўлишини хоҳламадим, чунки мен ёш мураббийлар келишини хоҳлардим.

Эди Иорданеску ихчам, мувозанатли жамоа тузди ва ўз ишини давом эттириш унга боғлиқ эди, бироқ, тушунишимча, у буни хоҳламаган. Мен унга Георги Хаджи билан гаплашишни маслаҳат бердим, чунки у терма жамоани яхши кўради.

Бошқа танловимиз йўқлиги сабабли, мен қайтиб келишим ва шу вақт ичида ўрганганларимни таклиф қилишим керак. Биламан, қийин бўлади, лекин ўйинчилар авлодига ишонаман, бу ғолиб жамоа. Бельгия ва Нидерландияга қарши ўйинларда содир бўлган воқеалар футболчиларда тажриба етишмаётганига яққол далил бўлди. Бу сезиларли даражада ўсиши мумкин бўлган ўйинчилар гуруҳи.

Менга пул керак эмас, қандайдир имидж яратиш, бошимдан кечирган ажойиб лаҳзалар мени терма жамоада ишлашга ундади. Менинг қароримга фақат футболга бўлган муҳаббатим сабаб бўлган. Жаҳон чемпионатида муваффақиятли иштирок этиш учун ҳамма нарсани қиламан.

Хотиним менга бу ишни олмасликни айтди. Ўғил Разван менга ўзим тўғри деб ҳисоблаган ва ҳис қилган нарсани қилишимни айтди. Менга қизиқиш пайдо бўлди, чунки бу осон бўлмайди", - деди Луческу.

"Зенит" ва "Шахтёр"нинг собиқ мураббийи Руминия терма жамоасини 1981 йилдан 1986 йилгача бошқарган.