Superligada 15-tur bahslari davom ettirildi. Turning markaziy uchrashuvi esa Qarshida kechdi. Unda «Nasaf» «Paxtakor»dan minimal hisobda ustun keldi. Bellashuvdan so‘ng "sherlar" bosh murabbiyi Maksim Shaskix matbuot anjumanida ishtirok etdi.

— Biz bugun yaratgan imkoniyatlardan foydalanganimizda hisob boshqacha bo‘lar edi. Har safar yigitlarga agar o‘zimizga o‘zimiz muammo tug‘dirmasak, chempionatda bizni yutadigan jamoa yo‘q ekanini aytib kelaman.

— «Paxtakor»da yaxshi o‘yin yo‘lga qo‘yilgan, ammo yakunda nimadir yetishmayapti?! Seleksiya ishlaridan ko‘ngilingiz to‘ldimi?

— Albatta ko‘nglim to‘ldi. Qayerda nima yetishmayapti bizga? Yangi kelganlar kirishib ketishga harakat qilmoqda. Afsuski, hammasi uchun vaqt kerak.

— 4 ta durang va ikkita mag‘lubiyat. «Nasaf» bilan o‘yinlarda hali g‘alaba qozonmadingiz. Bu nima bilan bog‘liq?

— Bu futbol. Asosiysi, dekabr oyidagi yakuniy maqsadga kim yetishi. Istalgan jamoaga yengilish, istalganini yengish mumkin. Masofa hali uzoq, o‘yinlar ko‘p.