"Roma" hujumchisi Artyom Dovbik Rim klubini Chempionlar ligasiga olib chiqishni orzu qilishini aytdi.
"Biz Chempionlar ligasiga qaytishimiz kerak. Bu har qanday vaziyatda erishish kerak bo‘lgan juda muhim maqsaddir. "Roma" bu turnirda uzoq vaqt o‘ynamadi" - dedi Dovbik La Gazzetta dello Sport bilan suhbatda.
O‘tgan mavsumda Dovbik barcha turnirlarda 41 ta o‘yinda qatnashib, 25 ta gol va 10 ta golli uzatmani amalga oshirgan. Futbolchining klub bilan amaldagi shartnomasi 2028 yilning yoziga qadar amal qiladi. Transfermarkt portalida berilgan ma’lumotlarga ko‘ra, futbolchining bozor qiymati 35 million yevroni tashkil qiladi.
2 avgust kuni "Roma" 27 yoshli ukrainalik futbolchi bilan shartnoma imzolangani haqida xabar bergan edi. Klub bilan shartnoma besh yilga mo‘ljallangan. Dovbik avvalroq “Jirona”da o‘ynagan.