Superligada 15-tur yakunlandi. Mavsumni ko‘tarinki kayfiyatda o‘tkazayotgan OKMK klubi bu tur o‘z maydonida "Navbahor"ni qabul qildi va 2:1 hisobida g‘alaba qozondi. Bellashuvdan so‘ng jamoa bosh murabbiyi Mirjalol Qosimov matbuot anjumanida ishtirok etdi.
Har doim "Navbahor" bilan shidatli o‘tadi o‘yinlarimiz. Qaysi stadionda bo‘lishiga qaramay, doim keskinlik bo‘ladi. Natijadan qoniqdim, o‘yindan emas. Bugun yigitlar men kutgandek o‘yin ko‘rsatgani yo‘q. Ko‘plab shogirdlarimning yo‘qligi sezildi. Eng muhimi, bugun natijani qo‘lga kiritdik. Bahs esdan chiqadi. Ko‘p ishlashimiz kerak.
Birinchi bo‘limda jamoa juda ko‘p to‘p yo‘qotdi. Xatolar g‘alabada ham ko‘zga tashlanmoqda?
Uchrashuv davomida "Navbahor" 3 ta markaziy himoyachi bilan chiqqani bizga ta’sir qildi. Juda ko‘p xolda oddiy vaziyatlarda to‘pni yo‘qotdik. To‘pni nazorat qilmadik. Bu bizga xos bo‘lmagan futbol. "Navbahor" kuchli ijrochilarga ega. Bu ham bosim qildi. Tinimsiz to‘p uchun kurashaverish katta kuch sarflashga sabab bo‘ldi.
"Navbahor"ning birinchi va ikkinchi davrada o‘zgarishlar sezdingizmi?
O‘yindan o‘yinga o‘zgarish bo‘ladi. Jamoa qanday tonusda bo‘lishiga bog‘liq. Tarkibning 90 foizi o‘sha-o‘sha edi. Sxemaning o‘zgargani bizga muammo tug‘dirdi. O‘zimiz ham juda ko‘p to‘p yo‘qotganimiz asabiylashishizga sabab bo‘ldi. Birinchi bo‘limda Akromning xato qilgani so‘zimga isbot bo‘ladi.
"Navbahor"ga o‘zgacha tayyorgarlikka qo‘shimcha ham qilganmidingiz?
Raqib jamoaning emas, o‘zimizni o‘yinimiz meni qiziqtiradi. Shogirdlarimga o‘zlaringiz yaxshi o‘ynasalaring, hech qanday muammo bo‘lmaydi deb aytaman. E’tiborni ko‘proq o‘zimizning futbolchilarga qaratamiz. Asosiysi, g‘alaba ruhi. Yengilmagan jamoa bo‘lmaydi. Bugun, "Paxtakor", "Andijon", "Nasaf" va "So‘g‘diyona"ga qarshi o‘yinlarda qo‘lni siltab yubormay, oxirigacha jang qildik.
OKMK chempionlikka hech qayerda da’vo qilmagan bo‘lsa ham, sekin-asta maqsadiga yaqinlashmoqda?!
Qaysi jamoada ishlagan bo‘lsam ham, doim muxlislar uchun to‘p surganmiz. Pul bor yoki yo‘qligidan qat’iy nazar. Ochkoni kuzda sanaymiz degan gap bor. Vaqt ko‘rsatadi.
OKMK Superligani ko‘plab klublardan farqli o‘laroq yaxshi legioner tanlay oladi. Bu bilan shaxsan o‘zingiz shug‘ullanasizmi?
O‘yinchilarni murabbiylar shtabi bilan birgalikda ko‘rib chiqamiz. Qaysidir pozisiyani kuchaytirmoqchi ekanligimizni aytamiz. Tanlovni doim birga qilamiz. Hozir, bu katta ma’suliyatli ishga aylangan. Futbolchilar bir-ikki mashg‘ulot o‘tkazib, o‘rtoqlik o‘yinlaridan so‘ng kontrakt imzolashga rozi bo‘lmasligi urfga aylangan. Masalan, Haqnazarini tarkibga qo‘shib olganimizda u 6 oy futbol o‘ynamagan futbolchi edi. Qolgani yaratganga tavakkal.
