Londonning "Chelsi" klubi "Manchester Yunayted"ning 24 yoshli vingeri Jeydon Sanchoga qiziqish bildirmoqda, deb xabar beradi Fussball News.
Manbaga ko‘ra, londonliklar "MYU"ga transfer narxini to‘lashga, shuningdek, o‘z akademiyasidan ikki nafar futbolchini qo‘shib berishga tayyor. Shu bilan bir qatorda, "Chelsi" Sanchoni sotib olish va uning maoshini qoplash majburiyati bilan ijaraga olishga tayyor.
O‘tgan mavsumning birinchi yarmida Sancho "mankunianliklar" bosh murabbiyi Erik ten Xag bilan mojaro tufayli asosiy jamoadan chetlatilgan edi. Ikkinchi davrada esa Dortmundning "Borussiya" klubida ijara asosida o‘ynadi. Bu davrda u barcha turnirlarda 21 ta uchrashuvda qatnashib, uchta gol va uchta golli uzatmani amalga oshirgan.
Futbolchining ingliz klubi bilan amaldagi mehnat shartnomasi 2026 yilning yoziga qadar tuzilgan. Transfermarkt portalida berilgan ma’lumotlarga ko‘ra, futbolchining bozor qiymati 30 million yevroni tashkil qiladi.
