Buxoroda yoshlarimizning o‘quv-mashg‘ulot yig‘ini davom etmoqda. Shu kunlarda O‘zbekiston yoshlar terma jamoasi Buxoro shahrida o‘quv-mashg‘ulot yig‘inini o‘tkazyapti.
12-avgust kuni boshlangan mashg‘ulotlar 31-avgust - 1-sentyabr kunlari Koreya Respublikasining Mungyong shahrida o‘tkaziluvchi yoshlar o‘rtasidagi Osiyo chempionatiga so‘nggi tayyorgarlik bosqich vazifasini o‘tab bermoqda. Qit’a birinchiligida to‘liq tarkibdagi dzyudochilarimiz medallar uchun tatamiga chiqishadi.
Terma jamoamizning bugungi mashg‘uloti boshlanishi oldidan O‘zbekiston dzyudo federasiyasi raisi o‘rinbosari Zafar Qahramonov, federasiyaning Buxoro viloyati bo‘limi raisi Shuhrat Ochilov, terma jamoalarimiz menejeri Eldor Qahhorov murabbiy va dzyudochilarimiz bilan uchrashishdi.
Shuhrat Ochilov bugun tavallud kunini nishonlayotgan Rio-2016 Olimpiadasi sovrindori Diyorbek O‘razboyevni tabriklab, shukrona kun sohibiga televizor sovg‘a qildi. O‘razboyev yoshlar terma jamoasi murabbiylar shtabi tarkibida Iskandar Rasulov va Kamol Murodovga yordam berib kelyapti.
