"Surxon" bosh murabbiyi Fevzi Davletov Superliganing 16-turi doirasida bo‘lib o‘tgan "Andijon"ga qarshi o‘yin borasida o‘z fikrini bildirib o‘tdi.

"Jangovor o‘yin bo‘ldi. Ajoyib futbol oqshomi ostida va zo‘r futbol havosi bilan. Juda ko‘p kuchimizni ushbu o‘yinga sarfladik. Birinchi 15 daqiqa bizga qiyinchilikni tug‘dirdi. Keyinchalik raqibimiz bilan tengma-teng o‘ynab, xavfli hujumlarni yaratdik. Ikkinchi bo‘lim ham 1-taymga o‘xshash bo‘ldi. Lekin bizda faqat bitta maqsad edi - g‘alaba qozonish. Biz ikkinchi gol urganimizdan so‘ng, o‘yinimiz biroz xatolarga boy bo‘ldi. Biz pozision himoya uslubiga o‘tdik, bundan keyin «Andijon»da standart vaziyatlar paydo bo‘ldi va bu jihatda raqibimiz hisobni tenglashtirdi. Lekin, keyinchalik biz 3-golni urib, g‘alabani qo‘lga kiritdik.

Yigitlarga shijoatli futbol uchun minnatdorchilik bildiraman, ular g‘alaba uchun oxirigacha kurashishdi. Muxlislarimizga ham rahmat. Uzoq masofadan kelib bizni qo‘llab-quvvatlashdi. Umumiy holda, biz haqli ravishta g‘alaba qozondik

Abdug‘afur juda ko‘p kurashlarda ishtirok etdi va o‘zini yo‘qotib qo‘ymadi. Uning o‘yinidan qoniqdim, olqishlayman. O‘yin davomida ko‘p mehnat qildi

Hisob 2:0 bo‘lgan paytida, biz juda yaxshi o‘ynadik. Keyinchalik raqibimiz o‘yinni kuchaytirib, hisobni tenglashtirdi. G‘alabaga oxirigacha ishondik. Shu ishonch tufayli g‘alabaga erishdik. Qiyin bo‘lgani rost, «Andijon» jamoasi har doim havodagi ustunlikka ega bo‘ladi, shuningdek qanotlar orqali xavfli vaziyatlarni ko‘p yaratadi. Biroq biz g‘alaba uchun oxirigacha kurashdik va muhim natijani qayd etdik", — dedi Davletov.

— «Surxon» O‘zbekiston kubogi yarim finalida yana «Andijon» bilan o‘ynaydi. Bu o‘yin haqida fikringiz qanday?
— To‘g‘ri, biz kubok yarim finalida yana «Andijon» bilan o‘ynaymiz. Ishonch bilan aytaman, umuman boshqacha o‘yin bo‘ladi. Ham bizda, ham «Andijon»da. Ochig‘ini aytsam, maydon holati og‘ir. Bu maydonda futbolchilar bor darajalarini ko‘rsatib bera olishmaydi. Imkoniyatlarni 50/50 baholayman.