"Barselona" va yarim himoyachi Ilkay Gyundoganning yo‘llari tez orada ajralishi mumkin.
33 yoshli futbolchining Kataloniya klubini tark etish istagi bir necha kun oldin ma’lum bo‘lgandi. Jurnalist Xelena Kondisning yozishicha, tajribali germaniyalik yarim himoyachi “Barselona”da qolishni xohlagan, biroq “ko‘k-anorranglilar”ning moliyaviy qiyinchiliklari tufayli rejalarini o‘zgartirishga majbur bo‘lgan.
Yuqori maosh oluvchi Gyundoganning ketishi "Barselona"ga Dani Olmoni ro‘yxatdan o‘tkazish va yana bir qancha yangilar bilan shartnoma imzolash imkonini beradi. Ilkay yordam berishni xohlaydi, shuning uchun u ketishga qaror qildi.
O‘tgan yozda Ilkay Gyundogan erkin agent sifatida "Manchester Siti"dan "Barselona"ga o‘tgandi. Futbolchining amaldagi shartnomasi 2026 yilgacha mo‘ljallangan.
