Armanistonning «Noa» klubi darvozaboni Ognen Chancharevich noyob gol muallifiga aylandi.
Uning o‘z hududidan tepgan to‘pi to‘g‘ridan-to‘g‘ri raqib jamoa darvozasiga borib tushdi. Yo‘q, qandaydir darajasi past o‘yin emas, Konferensiyalar Ligasi saralashida! Shu tariqa Chancharevich «Noa»ning AYEK (Gresiya)ga qarshi birinchi o‘yinda ishonchli g‘alaba qozonishiga katta hissa qo‘shdi - 3:1.
Nima bo‘ldi?
Armanistonning «Noa» klubi 6 avgust kuni Konferensiyalar Ligasi uchinchi saralash bosqichi dastlabki o‘yinida ancha mashhur AYEKni 3:1 hisobida yengdi. Gresiyaliklar 22-daqiqada Levi Garsiyaning aniq zarbasidan so‘ng hisobda oldinga chiqib olishdi, lekin mezbonlar tanaffusga qadar muvozanatni tiklash yo‘lini topishdi. Ikkinchi bo‘limda esa «Noa» g‘alabani o‘z tomoniga og‘dirdi. Ya’ni Ognen Chancharevich va Gonsalu Gregoriu tomonidan urilgan gollar armanlarga ishonchli g‘alaba taqdim etdi - 3:1. Ayniqsa, hal qiluvchi ahamiyat kasb etgan ikkinchi gol ijtimoiy tarmoqlarda kuchli reaksiya keltirib chiqardi: 67-daqiqada mezbonlar darvozaboni Chancharevich o‘z jarima maydonidan to‘pni kuchli zarb bilan oldinga tepdi. Qarangki, bu harakat shunchaki, to‘pni uzoqlashtirish emas, to‘laqonli samarali zarba bo‘lib chiqdi. Xullas, Ognen yo‘naltirgan to‘p raqib jamoa jarima maydoni yaqinida maydondan sapchib, AYEK darvozaboni Tomash Strakosha ustidan «uchib o‘tdi». Albaniya milliy jamoasi kiperi hayron. Ma’lum bo‘lishicha, Chancharevich 90 metr uzoqlikdan zarba yo‘llagandi.
Bu rekordmi?
Yo‘q. Chunonchi, Chancharevich darvozabon nuqtasidan zarba bermadi. To‘p jarima maydoni o‘rtalarida edi, ya’ni raqib darvozasidan chamasi 90 metr uzoqlikda. Rasmiy uchrashuvda eng uzoq masofadan urilgan gol sifatida Ginness rekordlari kitobiga kiritilgani esa Angliyaning «Nyuport» klubi sobiq darvozaboni Tom Kingga tegishli. U 2021 yili «Cheltenxem» darvozasini 96,01 metr uzoqlikdan nishonga olgandi. 2023 yili esa rekord uchun yangi da’vogar paydo bo‘ldi - «Kobresal» darvozaboni Leandro Reken Chili chempionatidan o‘rin olgan «Kolo-Kolo»ga qarshi o‘yinda o‘z joyidan to‘g‘ridan-to‘g‘ri zarba yo‘llab, gol muallifiga aylandi. Keyinchalik maxsus o‘lchov ishlari olib borildi va zarba nuqtasidan darvoza chizig‘igacha bo‘lgan masofa 101 metrni tashkil etgani ma’lum qilindi. To‘g‘ri, bu ko‘rsatkichning rasmiy tasdig‘i yo‘q.
Chancharevich kim?
Armaniston milliy jamoasining 34 yoshli darvozaboni. Asli serbiyalik kiper 2018 yilgacha faqat o‘z vatanida faoliyat yuritdi, keyin Armanistonning «Alashkert» klubi safiga qo‘shildi. Ognen 2023 yilga kelib, Armaniston fuqaroligini oldi va mamlakat terma jamoasida o‘ynay boshladi. Xullas, o‘tgan yilning iyun oyida debyutini nishonlagan Chancharevich hozirga qadar armanlar bosh jamoasi libosida 11 marta maydonga tushdi. Joriy yil yanvarda esa «Noa» Chancharevich bilan shartnoma tuzdi.
G‘alaba «Noa»ga nima beradi?
O‘z-o‘zidan tushunarli, AYEK ustidan qozonilgan g‘alaba - «Noa» uchun katta natija. Har holda, Armaniston chempionati kumush medali sovrindori Gresiya Superligasi-2023|2024ning ikkinchi jamoasiga qarshi bahsda favorit emasdi. Ilk o‘yinda 3:1 hisobi qayd etilgani esa armanlarda keyingi bosqichga chiqish imkoniyatini ancha oshirdi. Agar «Noa» javob o‘yinida kerakli natijaga erishsa, unda yangi tizimda bo‘ladigan KL-2024|2025 guruh bosqichi yo‘llanmasi taqdiriga oydinlik kirituvchi oxirgi saralash dovoni («pley-off»)da «Rujomberok» (Slovakiya) — «Xayduk» (Xorvatiya) juftligi g‘olibi bilan kuch sinashadi.
A.ABDUVALIXO‘JAYEV tayyorladi
