"Lion" yarim himoyachisi Rayan Sherki Angliyaga o‘tishga yaqin turibdi.
21 yoshli futbolchi uzoq vaqtdan beri "PSJ"ning transfer maqsadi hisoblangan, biroq poytaxt grandlari “Lion” bilan kelishuvga erisha olmadi. Ammo "Fulxem" buni uddalay oldi: L'Equipe nashri xabariga ko‘ra, "to‘quvchilar" londonliklarning 20 million yevrolik taklifidan qanoatlanishgan, shundan 5 millioni bonuslar edi.
Rayan Sherkining amaldagi shartnomasi kelasi yil yozida tugaydi, shu sabab uning narxi nisbatan arzon. Futbolchi “Lion” safida barcha turnirlarda 141 ta o‘yinda maydonga tushib, 17 ta gol urdi va 25 ta golli uzatmani amalga oshirdi.
