«Metallurg» - «Dinamo» (0:1) o‘yinidan keyingi matbuot anjumanida jurnalistlar Vadim Abramovdan Superligadagi maydonlar holati, jamoalarning o‘z uyida emas, boshqa shaharlardagi stadionlarda to‘p surishga majbur bo‘layotgani haqida so‘rashdi.

- Stadionlar masalasida berayotgan savolingiz bo‘yicha ko‘pchilik murabbiylar gapirishdi, bu borada birinchi emasman. Aksariyat stadionlarni yopib, 2-3ta jamoani bitta maydonda qanday o‘ynatish mumkin? Buni qaysi maydon ko‘tara oladi? Keling, Samarqanddagi o‘zimizni maydon misolida gapirsam. Yangilangan maydonimizga juda ko‘p zarur kimyoviy o‘g‘itlarini berib borish, alohida parvarishlash kerak. Bu maydonga qarash, parvarishlash uchun katta mablag‘ talab etiladi. Hozircha maydonni yangilagan firma ishchilari parvarishlamoqda, o‘z vaqtida urug‘i, kimyoviy qo‘shimchalarini berishmoqda. Ammo ular ketgach nima bo‘ladi? Buni saqlab turishning o‘zi bo‘lmaydi. O‘zi bizda ko‘rkam maydon bor edi. Shunchaki olib tashladilar. Hozirgi maydon qancha vaqt talabga javob berishi o‘ylantiradi. Keyingi mavsumda bu masalaga to‘xtalsa bo‘ladi. Bu faqat bizdagi maydon bilan bog‘liq emasligini ko‘ryapmiz. Maydonlarga chim yotqizilayotganda, mahalliy iqlim sharoitini ham hisobga olish kerak. Har holda Nukusdagi iqlim Toshkentdagidan farq qiladi yoki aytaylik, Qarshi uchun yaxshi bo‘lgan maydon Samarqandda ham yaxshi bo‘ladi, degani emas. Shu bois maydon masalasida hamma o‘z ishi bilan shug‘ullansa, hammasi yaxshi bo‘ladi. Ammo hozir ko‘rib turibsiz, aksariyat jamoalar qayerda o‘ynashni bilishmayapti. Nimanidir yaxshi qilishni istayapmiz, ammo yakunda unday bo‘lmayapti.

- Endi milliy jamoalar o‘yinlari sababli Superligada katta tanaffus yuzaga keladi. «Dinamo»ning hozirgi tarkibidan kimlarni milliy jamoaga to‘p surishga munosib deya olasiz?
- Bu masalada gapirishni istamasdim. Milliy jamoamizda bosh murabbiy bor. Ular kimni taklif etishni, qayerda o‘ynatishni yaxshi bilishadi. Shu bois bu savol menga emas.

- «Dinamo»ning yetakchi o‘yinchilari bilan keyingi mavsum uchun shartnomani hozirdan uzaytirish masalasi ko‘rib chiqilyaptimi?
- Ko‘ramiz, hali mavsumni yakunlab olishimiz kerak. Bu masalaga hali to‘xtalamiz.