Britaniyalik bloger va Misfits Boxing promouterlik kompaniyasi asoschisi, KSI nomi bilan mashhur Deji Olatunji futbol yulduzlari Krishtianu Ronaldu va Zlatan Ibrahimovich o‘rtasida boks jangini tashkil etishga qiziqish bildirdi.
“Ronaldu va Ibrahimovich o‘rtasidagi jang? Hech qachon oldindan nima bo‘lishini bila olmaysan. Ular o‘rtasidagi qarama qarshilik — bu ajoyib bo‘lardi”, dedi bloger talkSPORT nashriga bergan intervyusida.
Misfits Boxing — bu yulduzlar va ijtimoiy media shaxsiyatlari o‘rtasidagi boks janglarini tashkil qiluvchi kompaniya. Ushbu tashabbusni YouTube yulduzi KSI Wassermang Boxing va boshqa hamkorlar bilan birgalikda boshlagan.
Misfits Boxing 2022 yilda ilk tadbirini o‘tkazdi va shundan beri ijtimoiy media yulduzlarini boks maydoniga olib chiqib, keng omma orasida ommalashib kelmoqda. Bu janglarda ko‘pincha YouTube, TikTok va boshqa ijtimoiy tarmoqlarning mashhur shaxslari ishtirok etadi.
Misfits Boxing an’anaviy boks va ijtimoiy media dunyosini birlashtirgan innovasion loyiha hisoblanadi.
31 avgust kuni Dublinda Misfits Boxing X Series 17 tadbiri bo‘lib o‘tadi, unda “Lester Siti”ning sobiq himoyachisi va Angliya chempioni Denni Simpson YouTube blogeri Denni Aaronsga qarshi jang qiladi.
