Британиялик блогер ва Misfits Boxing промоутерлик компанияси асосчиси, KSI номи билан машҳур Дежи Олатунжи футбол юлдузлари Криштиану Роналду ва Златан Ибраҳимович ўртасида бокс жангини ташкил этишга қизиқиш билдирди.
“Роналду ва Ибраҳимович ўртасидаги жанг? Ҳеч қачон олдиндан нима бўлишини била олмайсан. Улар ўртасидаги қарама қаршилик — бу ажойиб бўларди”, деди блогер talkSPORT нашрига берган интервьюсида.
Misfits Boxing — бу юлдузлар ва ижтимоий медиа шахсиятлари ўртасидаги бокс жангларини ташкил қилувчи компания. Ушбу ташаббусни YouTube юлдузи KSI Wassermang Boxing ва бошқа ҳамкорлар билан биргаликда бошлаган.
Misfits Boxing 2022 йилда илк тадбирини ўтказди ва шундан бери ижтимоий медиа юлдузларини бокс майдонига олиб чиқиб, кенг омма орасида оммалашиб келмоқда. Бу жангларда кўпинча YouTube, TikTok ва бошқа ижтимоий тармоқларнинг машҳур шахслари иштирок этади.
Misfits Boxing анъанавий бокс ва ижтимоий медиа дунёсини бирлаштирган инновацион лойиҳа ҳисобланади.
31 август куни Дублинда Misfits Boxing Х Series 17 тадбири бўлиб ўтади, унда “Лестер Сити”нинг собиқ ҳимоячиси ва Англия чемпиони Дэнни Симпсон YouTube блогери Дэнни Ааронсга қарши жанг қилади.
