Samarqand shahri baydarka va kanoeda eshkak eshish bo‘yicha Jahon chempionatiga mezbonlik qildi.

Kecha, 25 avgust kuni musobaqaning so‘nggi kuni doirasida rossiyalik kanoechi Zaxar Petrov 500 metr masofaga final bosqichida ishtirok etdi.

Petrovning chiqishida antiqa hodisa yuz berdi. Sportchi finishga oz qolganida qayig‘i ag‘darilib ketdi, shunga qaramasdan, qayiq finishni kesib o‘tdi. Ammo rasmiy protokolda Zaxarning natijasi dastlab, hisobga olinmadi.

Shundan so‘ng Petrov tomoni tashkilotchilarga protest bildirdi. Qayta tekshirilgach, Zaxarning oltin medal qo‘lga kiritgani e’lon qilindi.

Ammo bir ozdan so‘ng Zaxardan oltin medal olib qo‘yilgani va u rasmiy protokolda finishga qadar yetib kela olmagani qayd etildi. Oltin medal esa ikkinchi bo‘lgan moldovalik Sergey Tarnovskiyga nasib etdi.

Ma’lum bo‘lishicha, Rossiya eshkak eshish federasiyasi ushbu qarordan so‘ng, yana bir bor tashkilotchilar tomon protest kiritgan.

Rossiyalik sportchilar ushbu musobaqada neytral maqomda qatnashmoqda.

Ushbu musobaqada O‘zbekiston terma jamoasi a’zolariga medallar nasib etmadi.