"Barselona" hujumchisi Robert Levandovski Polsha terma jamoasidagi kelajagi haqida gapirdi.
Polsha futbol yulduzi o‘tgan oy 36 yoshga to‘ldi. Forvard sentyabr oyida bo‘lib o‘tadigan Millatlar ligasi o‘yinlariga taklif oldi, ammo terma jamoadagi uzoq muddatli kelajagi haqida hali aniq emas.
"Men necha yoshda ekanligimni bilaman va bilamanki, ba’zi lahzalar hech qachon qaytarilmaydi, shuning uchun kelajakda hech narsadan afsuslanmaslik uchun hamma narsaga boshqacha munosabatda bo‘lishga, imkon qadar sodir bo‘layotgan narsadan zavq olishga harakat qilaman. Hozirda maqsadim Millatlar ligasi o‘yinlarida ishtirok etish. Men bu yerda ekanligimdan xursandman, hozir faqat shu haqida o‘ylayapman”, dedi Levandovski matbuot anjumanida.
