Vengriya poytaxti Budapesht shahrida bugun Butunjahon shaxmat olimpiadasining 3-tur o‘yinlari bo‘lib o‘tmoqda. O‘zbekiston erkaklar va ayollar terma jamoalari g‘alabali yurishni davom ettirishdi.
Yigitlarimiz Xorvatiyaga qarshi keskin bahs olib borishdi. Javohir Sindarov, Nodirbek Abdusattorov va Shamsiddin Vohidov o‘z partiyalarida g‘alaba qozonishgan bo‘lsa, Nodirbek Yoqubboyev raqibi bilan durangga imzo chekdi. Hisob — 3,5 - 0,5.
Qizlarimiz esa sensasion ravishda reyting bo‘yicha o‘zlaridan ustun hisoblangan mezbon — Vengriya terma jamoasini mag‘lub etishdi. O‘yinlar davomida ustunlik u tomondan bu tomonga o‘tib turdi. Umida Omonova va Afruza Hamdamova raqib xatosidan foydalanib, g‘alabani o‘z tomonlariga og‘dirishgan bo‘lsa, Marjona Malikova raqibi bilan tezkor durangga imzo chekdi. Nilufar Yoqubboyeva esa debyutdagi katta ustunlikdan foydalana olmadi hamda yakunda mag‘lubiyatga uchradi. Yakuniy hisob — 2,5 - 1,5.
Har ikki terma jamoamizning ochkolari 6 taga yetdi va ular peshqadamlar safida borishmoqda. Jamoalarimizning 4-turdagi raqiblari biroz keyinroq aniq bo‘ladi.
