Венгрия пойтахти Будапешт шаҳрида бугун Бутунжаҳон шахмат олимпиадасининг 3-тур ўйинлари бўлиб ўтмоқда. Ўзбекистон эркаклар ва аёллар терма жамоалари ғалабали юришни давом эттиришди.

Йигитларимиз Хорватияга қарши кескин баҳс олиб боришди. Жавоҳир Синдаров, Нодирбек Абдусатторов ва Шамсиддин Воҳидов ўз партияларида ғалаба қозонишган бўлса, Нодирбек Ёқуббоев рақиби билан дурангга имзо чекди. Ҳисоб — 3,5 - 0,5.

Қизларимиз эса сенсацион равишда рейтинг бўйича ўзларидан устун ҳисобланган мезбон — Венгрия терма жамоасини мағлуб этишди. Ўйинлар давомида устунлик у томондан бу томонга ўтиб турди. Умида Омонова ва Афруза Ҳамдамова рақиб хатосидан фойдаланиб, ғалабани ўз томонларига оғдиришган бўлса, Маржона Маликова рақиби билан тезкор дурангга имзо чекди. Нилуфар Ёқуббоева эса дебютдаги катта устунликдан фойдалана олмади ҳамда якунда мағлубиятга учради. Якуний ҳисоб — 2,5 - 1,5.

Ҳар икки терма жамоамизнинг очколари 6 тага етди ва улар пешқадамлар сафида боришмоқда. Жамоаларимизнинг 4-турдаги рақиблари бироз кейинроқ аниқ бўлади.