Bir kunlik tanaffusdan so‘ng 45-Butunjahon shaxmat olimpiadasida bahslar davom ettirildi. Bugun 7-tur o‘yinlari o‘tkazildi.

O‘zbekiston erkaklar terma jamoasi Ukrainaga qarshi to‘qnashuvda ishonchli g‘alabani qo‘lga kiritdi. Nodirbek Abdusattorov raqibini juda tez taslim etdi. Shundan so‘ng Javohir Sindarov ham sobiq jahon chempioni Ruslan Ponamaryovni mag‘lub etdi.

Shamsiddin Vohidov va Nodirbek Yoqubboyev o‘z partiyalarida durang qayd etib, yakuniy g‘alabaga hissa qo‘shishdi — 3-1. O‘zbekiston o‘z ochkolarini 12 taga yetkazib, kuchli uchlikka kirib oldi.

Qizlarimiz esa yana bir kuchli raqib ustidan g‘alaba qozonishdi. Bu safar Gresiya taslim etildi. Nodira Nodirjonova va Umida Omonova raqibning xatosidan unumli foydalanib, g‘alabaga erishishdi. Marjona Malikova ham g‘alabaga yaqin edi, ammo ustun vaziyatni g‘alabaga aylantira olmadi. Natijada bu partiyada durang qayd etildi.

Birinchi raqamli shaxmatchimiz Afruza Hamdamova ham durangga yaqin edi. Ammo o‘yin so‘ngida birgina xato tufayli mag‘lubiyatga uchradi. Yakuniy hisob — 2,5 - 1,5.

Ushbu g‘alabadan O‘zbekiston ayollar terma jamoasi o‘z ochkolarini 11 taga yetkazib, kuchli o‘nlikdan o‘rin oladi.

Erkaklar terma jamoamiz

O‘ZBEKISTON - UKRAINA - 3 - 1.
Nodirbek Abdusattorov - Andrey Volokitin - 1:0
Nodirbek Yoqubboyev - Vasil Ivanchuk - 0,5 - 0,5
Javohir Sindarov - Ruslan Ponamaryov - 1:0
Shamsiddin Vohidov - Anton Korobov - 0,5 - 0,5

Ayollar terma jamoamiz

O‘ZBEKISTON - GRESIYA  - 2,5:1,5.
Afruza Hamdamova - Stavrula Tsolakidou - 0:1
Umida Omonova - Anastaiya Avramidou - 1:0
Marjona Malikova - Yekaterini Pavlidou - 0,5 - 0:5
Nodira Nodirjonova - Xaritomeni Markantonaki - 1:0