Ertaga London shahridagi muhtasham "Uembli" stadionida professional boks turniri o‘tkaziladi.

Oqshomning markaziy jangida britaniyalik superog‘ir vazn toifasi vakillari - IBF, WBA, WBO va IBO yo‘nalishlarida sobiq jahon chempioni Entoni Joshua hamda vaqtinchalik IBF kamari sohibi Daniel Dyubua o‘zaro to‘qnash keladi. Ushbu jang to‘laqonli IBF chempionlik kamari uchun o‘tkaziladi. Bir muddat avval qolgan barcha kamarlar sohibi Aleksandr Usik bu titulni vakant qoldirgan edi.

Kecha bokschilar so‘nggi bor face to face marosimida yuzma-yuz kelishdi. Shuningdek, matbuot anjumani ham tashkil etildi. Unda ikki britaniyalikdan tashqari, ularning promouterlari Eddi Xirn va Frenk Uorren ham ishtirok etdi hamda jurnalistlarni qiziqtirgan savollarga javob berdi. "Uembli" stadionidagi oqshom uchun chiqarilgan 96 mingta chiptaning bari allaqachon sotib bo‘lingan.

Ma’lumot uchun, 26 yoshli Daniel Dyubua professional boksda 2017 yilda debyut qilgan. 2022 yilning iyun oyida amerikalik Trevor Brayanni nokautga uchratib, WBA Regular kamarini qo‘lga kiritgan. Shu yil iyun oyida Dyubua xorvatiyalik Filipa Xrgovichga ilk mag‘lubiyatni taqdim etish barobarida vaqtinchalik IBF chmpioniga ham aylangan edi.

Entoni Joshua hozira 34 yoshda. U havaskorlar o‘rtasida London-2012 Olimpiadasi chempioni hisoblanadi. Professional ringda 2013 yilda debyut qilgan. 2016 yilning aprelida ilk bor jahon chempioni bo‘lgan. Keyin esa ukrainalik Vladimir Klichko, so‘ngra Yangi Zelandiya bokschisi Jozef Parkerni mag‘lubiyatga uchratib, uchta jahon chempionlik kamarlarini o‘z qo‘lida birlashtirgan.