O‘zbekiston Superligasining 20-turidan o‘rin olgan bahsda “Navbahor” o‘z maydonida Jizzaxning “So‘g‘diyona” jamoasini qabul qiladi.

Mazkur klublar O‘zbekiston chempionatlarining Cuperliga (oliy liga)sida o‘zaro 57 marta uchrashishgan.

Ushbu o‘yinlarning 27 tasida “Navbahor” g‘alaba qozongan bo‘lsa, “So‘g‘diyona” 22 ta bahsda zafar quchgan, 8 ta o‘yinda esa durang qayd etilgan. To‘plar nisbatidagi ko‘rsatkich 95-65, “Navbahor” foydasiga.

Namanganliklar o‘zaro o‘yinlarda 89 ochkoni qo‘lga kiritishgan bo‘lsa, jizzaxliklar hisobida 74 ochko mavjud.

“Navbahor” – “So‘g‘diyona” klublari o‘rtasidagi o‘zaro uchrashuvlardagi eng yirik hisob 1996 yili qayd etilgan. O‘sha yili “lochinlar” Namanganda jizzaxliklar darvozasiga 7 ta javobsiz to‘p kiritishgandi.

Sermahsullik borasida esa 2000 va 2014 yillardagi uchrashuvlar tarixda qolgan.
E’tiborlisi, o‘sha o‘yinlarda darvozalarga to‘qqiztadan gol urilgan.
2000 yili Namanganda bo‘lib o‘tgan uchrashuvda mezbonlar 6:3 hisobida zafar quchishgan bo‘lsa, 2014 yili Jizzaxda o‘tkazilgan bahsda “So‘g‘diyona” 5:4 hisobida g‘alaba qozongandi.
Namanganda bo‘lib o‘tgan 28 uchrashuvning 21 tasida “lochinlar” zafar quchishgan bo‘lsa, 2 ta o‘yinda jizzaxliklar g‘alaba qozonishgan, 5 ta bahsda esa jamoalar durangga imzo chekishgan.

“Navbahor”ning o‘z maydonida bo‘lib o‘tgan o‘yinlaridagi to‘plar nisbati – 63-17, namanganliklar foydasiga.

Mazkur jamoalarning 1-davrada Jizzaxda bo‘lib o‘tgan bahsida jamoamiz 2:1 hisobida zafar quchgandi. Mezbonlarning goliga Lupcho Doriyev (79-pen.), "lochinlar"ning gollariga esa Toma Tabatadze (22-pen.) va Jamshid Iskanderov (51-daq.)lar mualliflik qilishgandi.

Eslatib o‘tamiz, “Navbahor” – “So‘g‘diyona” o‘yini 26 sentyabr kuni Namangandagi “Markaziy” stadionida soat 18:30 da start oladi.