"Barselona"ning hujumkor yarim himoyachisi Frenki de Yong Kataloniya klubidagi yuqori maoshi, shuningdek, jarohat olgan to‘pig‘ini operasiya qilishdan bosh tortgani haqidagi xabarlarni rad etdi.
"Jurnalistlar men haqimda juda ko‘p gapirishdi: operasiya qilishni istamaganim va menga katta pul to‘lashayotgani haqida. 37 million yevro kabi raqamlar bor edi. Ammo haqiqat bundan juda uzoqda. Men barcha kartalarimni ko‘rsatishga tayyor emasman, lekin bu raqamlar haqiqatdan yiroq. Ko‘p pul topaman, operasiyadan bosh tortaman, mashg‘ulot o‘tkazmayman va “ta’tildaman” deb o‘ylaganliklari uchun xafa bo‘lganlarni tushunaman, biroq bularning barchasi haqiqatga to‘g‘ri kelmaydi", dedi de Yong.
