FIFA kunlari munosabati bilan milliy chempionatimizda yuzaga kelgan tanaffusni jamoalar o‘rtoqlik nazorat uchrashuvlari bilan to‘ldirishmoqda. Haftalik tayyorgarlik siklini bugun “Metallurg” jamoasi o‘z o‘yida Jizzaxning “So‘g‘diyona” jamoasiga qarshi ko‘rik o‘yini bilan yakunladi.

“Metallurg” markaziy stadionida kechgan bahs qiziqarli kurashlarga boy bo‘ldi. Har ikkala jamoa murabbiylar shtabi bo‘lg‘usi raqiblarining o‘yin uslublaridan kelib chiqib, o‘yin taktikalarini shakllantirish borasidagi rejalarini ko‘zdan kechirib olishdi.

O‘yin mezbonlarning ustunligi ostida o‘tdi va u qayd etilgan hisobda ham o‘z aksini topdi. Dastavval maydon egalarining xavfli hujumini qaytarish chog‘ida mehmonlar himoyachisi Islomjon Qobilov to‘pni o‘z darvozasiga kiritib qo‘ydi. Birinchi taym o‘rtalariga kelib jarohatdan qutilib, jismoniy tayyorgarligini maromiga yetkazib borayotgan Shahzodjon Ne’matjonov hisobdagi farqni oshirdi.

Ikkinchi taymda esa jamoa sardori Zabixillo O‘rinboyev hisobni yirik ko‘rinishga keltirib qo‘ydi – 3:0. Har ikkala jamoa murabbiylari ixtiyoridagi barcha o‘yinchilarni maydonga tushirib ko‘rishdi.

Eslatib o‘tamiz, “Metallurg” Superliganing navbatdagi uchrashuvini 19 oktyabr sanasida Olmaliq shahrida “Andijon”ga qarshi o‘tkazadi. O‘yin soat 17:15 da boshlanadi.

Nazorat uchrashuvi
"Metallurg" – "So‘g‘diyona" – 3:0. Bekobod. 12.10.2024 yil. "Metallurg" markaziy stadioni.
Gollar: Islom Qobilov (avtogol), Shahzodjon Ne’matjonov, Zabixillo O‘rinboyev