Stokgolmdagi Kilian Mbappe yashagan mehmonxonada sodir etilgan zo‘rlash bo‘yicha tergov boshlandi.

Avvalroq, "Real" hujumchisi Shvesiyaga safari chog‘ida do‘stlari bilan tunab qolgan Stokgolm markazidagi mehmonxonada zo‘rlash haqidagi shikoyat yuzasidan polisiya tekshiruvi boshlangani ma’lum bo‘lgan edi. 10 oktyabr kuni Fransiyaning Isroilga qarshi Millatlar ligasi o‘yini kuni guruh restoran va tungi klubga tashrif buyurishdi — jabrlanuvchining so‘zlariga ko‘ra, mehmonxonadagi jinoyat shu kuni sodir bo‘lgan.

Mbappe bu ma’lumotni "soxta" deb atadi va bu xabar "PSJ"ning unga 55 million yevro miqdoridagi maosh qarzini to‘lash haqidagi apellyasiyasi bo‘yicha tinglovdan bir kun oldin paydo bo‘lganini ta’kidladi. Parij klubi Mbappening so‘zlarini "sharmandalik" deb atadi.

Bugun Shvesiya prokuraturasi zo‘rlash bo‘yicha shikoyatdan so‘ng dastlabki tergov boshlangani haqida press-reliz e’lon qildi.

"Ommaviy axborot vositalarida Stokgolmdagi zo‘rlash sodir etilgani haqidagi xabarlardan so‘ng, prokuratura polisiyaga zo‘rlash bo‘yicha shikoyat kelib tushganligini tasdiqlashi mumkin. Xabarda aytilishicha, voqea 2024 yil 10 oktyabr kuni Stokgolm markazidagi mehmonxonada sodir bo‘lgan.

Dastlabki tergovni katta prokuror Marina Chirakova olib bormoqda. Prokuror OAV uchun mavjud emas va hozircha qo‘shimcha ma’lumot bera olmaydi. Qo‘shimcha ma’lumotlar paydo bo‘lgach, yangi press-reliz e’lon qilinadi”, — deyiladi prokuratura xabarida.

Matbuot xabarida Mbappening ismi tilga olinmagan. Avvalroq Shvesiyaning Expressen va Aftonbladet nomli ikkita gazetasi tergov Kilianga tegishli ekanligini xabar qilgan edi.