O‘zbekistonlik kanoechi Shohmurod Xolmurodovning organizmida taqiqlangan Klomifen moddasi borligi aniqlanib, u sportdan 3 yilga diskvalifikasiya qilindi.

Kanoechi Butunjahon antidoping kodeksining 2.1 qoidasi (Taqiqlangan modda yoki uning metabolitlari va markerlari sportchi analizida mavjudligi)ni buzganligi sababli Butunjahon antidoping kodeksining 10.2.1 bandiga asosan 3 yil muddatga diskvalifikasiya qilindi.

Qayd etilishicha, diskvalifikasiya jazo muddatini o‘tayotgan shaxs muddat tugaganga qadar xalqaro va milliy toifadagi musobaqalar va o‘quv-mashg‘ulot yig‘inlarida ishtirok etishi taqiqlanadi. Yuqoridagi talablar bajarilmagan taqdirda ushbu shaxsga umrbod diskvalifikasiya muddati qo‘llanilishi mumkin. Shuningdek, kodeksda sport federasiyasi yoki assosiasiyasiga nisbatan ham jazo chorasi qo‘llash mumkinligi belgilangan.

Ma’lumot uchun, Xolmurodov o‘tgan yili Xitoyning Xanchjou shahrida o‘tkazilgan Osiyo o‘yinlarining juftlik bahslarida ishtirok etib, g‘oliblikni qo‘lga kiritgan.

Murabbiyning “Gazeta.uz”ga ma’lum qilishicha, bu cheklov uning avvalgi musobaqalardagi natijasiga ta’sir qilmaydi. U Osiyo o‘yinlarida olgan oltin medali uchun oylik olishda davom etadi. Hozir mashg‘ulotlarda ham qatnashyapti. Lekin musobaqalarga chiqolmaydi.

Shuningdek, murabbiy sportchi mazkur moddani muolaja vaqtida bilmasdan qabul qilganini tan olganini ma’lum qilgan.

“Unga 4 yil berishmoqchi edi, muolaja qilgani uchun 3 yil berishdi”, deydi murabbiy.

Ma’lum bo‘lishicha, sportchi ayni doping sababli O‘zbekistonda o‘tgan 2024 yilgi jahon chempionatini ham o‘tkazib yuborgan.