Superligada 22-tur o‘yinlari davom ettirildi. «Paxtakor» jamoasi bu tur safarda «Qizilqum» bilan kuch sinashdi va 0:2 hisobida imkoniyatni boy berdi. Bellashuvdan so‘ng jamoa murabbiyi Kamoliddin Tojiyev matbuot anjumanida ishtirok etdi.

— To‘pni va o‘yinni nazorat qilib, ikki to‘p farqi bilan yutqazdik. Ikkita xato ikkita gol bilan tugadi.

— «Paxtakor»ga nima yetishmayapti?

— Bizda gol uradigan hujumchi yo‘q. Vaziyatlar yaratib darvozaga tepmasa, gol bo‘lmaydi.

— Xoldorxonovning maydonga tushishi hujumni kuchaytirirish rejasi edimi?

— Biz 3 markaziy himoyachi bilan to‘p tepayotgan edik. Keyin, mudofaa vakillari sonini 4 taga yetkazib Xoldorxonovni hujumga tashladik. Azmiddinov qanot himoyachisii vazifasini bajardi. Bir-ikki o‘zgarish nishonga tegmadi.

— Qarshidagi ikki uchrashuvda ham ochko yo‘qotdingiz, buni stadionga qandaydir taluqli joyi bormi?

— Maydonning ta’siri emas. Bugun ikkita xato qildik va bu gol bo‘ldi. Ba’zida 20 ta xato qilganda ham raqib darvoza oldiga yaqinlasha olmaydi.

— «Paxtakor» sovrinli o‘rinlar uchun kurashdan chiqdimi?

— Nega? Biz oxirigacha kurash olib boramiz.