«Ayntraxt»ning 25 yoshli misrlik futbolchisi Omar Marmush mavsum startida yuksak sermahsullik namoyish etmoqda:
«Volfsburg»ga qarshi bahsda dubl, «Kill»ga qarshi 2}2, «Bavariya»ga qarshi 2}1!
Bundesliga doirasida Omar kutilganidan 3,9ta ko‘proq gol urdi - faoliyatida avval qayd etilmagan fantastik ko‘rsatkich. Marmush hozir ajoyib sport formasida yoki tez orada uning qulay vaziyatlardan foydalana olmaganiga guvoh bo‘lamiz. Ayni pallada faqat Markus Tyuram (4,4ta ko‘proq) Omardan oldinda bormoqda. Bunday natijaga Koul Palmer ham havas qiladi.
Assistlar borasida holat o‘zgacha: kutilgani 3,8, amaldagisi 4. Bu esa Omar ko‘plab vaziyatlar yaratishini (faqat Rafinya va Lamin Yamalda ko‘proq), jamoadoshlari esa imkoniyatlardan unumli foydalanishlarini anglatadi.
Kolo-Muani sotib yuborilmaganida, bunday bo‘lmasligi mumkin edi
Marmush «Ayntraxt»ga bir yil avval, erkin agent maqomida «Volfsburg»dan o‘tgandi. 2017 yilda aynan shu jamoa 18 yoshli iqtidorni Misrning «Vadi Degla» klubidan olib kelgandi. Biroq Omarning omadi chopmadi. U «Sankt-Pauli» va «Shtutgart»da ijara asosida to‘p surdi, kontraktning so‘nggi yilida esa «bo‘rilar» safida 5ta gol va 1ta samarali uzatmani rasmiylashtirdi. Kamtarona ko‘rsatkich.
O‘tgan yildagi yozgi transfer darchasining so‘nggi kunida «Ayntraxt» Randal Kolo-Muanini 95 mln. yevro evaziga «PSJ»ga sotib yuborgandi. Bundesliganing 2022|23 yillardagi gol}pas tizimi bo‘yicha yetakchi o‘yinchisi hozir Parijda azob-uqubat chekmoqda. Kelishuv amalga oshmasligi ham mumkin edi: «Ayntraxt» Kolo-Muani o‘rnini to‘ldiradigan o‘yinchi xarid qilmagandi, lekin mo‘may daromaddan voz kecha olmadi.
Agar Randal jamoada qolganida, Marmush xuddi «Volfsburg»dagidek qanotga yaqin hududda o‘ynagan bo‘lardi. Biroq u to‘g‘ridan-to‘g‘ri markaziy hujumchi pozisiyasini egalladi.
O‘zgarish o‘z samarasini berdi. 2023|24 yillar mavsumida Omar eng yaxshi ko‘rsatkichlarga erishdi: Bundesliga doirasida 12ta gol va 6ta samarali uzatmani o‘z hisobiga yozib qo‘ydi. Garchi u barqarorlikka erisha olmagan bo‘lsada, yevrokubok musobaqalarini xush ko‘radigan jamoa uchun munosib ekanligini isbotladi.
Hozirning o‘zida Marmush - bo‘shliqda dunyoning eng xavfli o‘yinchilaridan biri
«Bavariya» bilan kechgan bahs (3:3) - fikrimizning tasdig‘i. «Ayntraxt»ga qarshi bahsga qadar «Bavariya» umuman, yakka peshqadam maqomida edi. Misol uchun, Virs, Frimpong va «Bayer»ning boshqa tezkor o‘yinchilari unga qarshi birorta shiddatli reydni uyushtira olishmadi. Omar esa uchchala golda (2}1) muhim rol o‘ynadi. Birinchi golda u chap qanotga o‘tib, Upamekano va Kimdan uzoqlashib oldi. Fares Shaibi bejizga Noyer darvozasi tomon yugurmaydi, Upamekanoni o‘ziga jalb etib, Marmush uchun bo‘shliq yaratadi. Omar esa Rafa Gerreyrudan tezkorroq. Boz ustiga, Gerreyru pozisiya tanlashda xatoga yo‘l qo‘ydi: Marmushning chap qanotga intilishini kutgandi, u esa markazdan hujumga o‘tib, hisobni ochdi.
Ikkinchi golda Omar Upamekanoni butunlay yakson qildi. Vaholanki, u bundesliganing 2 eng tezkor markaziy himoyachining biri hisoblanadi. Marmush to‘p bilan yugurishiga qaramay, dahshatli tezlik evaziga Dayoni ortda qoldirdi va to‘pni Yugo Ekitikka uzatdi.
Uchinchi gol - Marmushning ochilish klassikasi mahsuli. Rasman u Kimga qarshi to‘p uchun kurashda imkoniyatni boy berdi. Biroq «Ayntraxt» uchun kurashda g‘olib chiqish, Omar uchun himoyachilar ortiga o‘tib olish muhimroq edi. Amalda shunday bo‘ldi: urilib qaytgan to‘pga raqib o‘yinchisi yugurgan pallada Marmush to‘pni qaysi nuqtaga uzatishini ko‘rsatgan, Kim esa qaytishga ulgurmagandi.
Vaziyatlardan foydalanish uslubi ham qoyil qoladigan darajada: kuchli, aniq va o‘z vaqtida amalga oshirilgan zarbalar.
Vensan Kompani ayniqsa, ikkinchi goldan keyin Marmushning harakatlaridan kuchli taassurot olgandi: «Ekitikka assistni amalga oshirishdan avval nimalar qilgani doim uchramaydigan hodisa. Upamekanoni aldab o‘tishni bu mavsumda hech kim uddalay olmagandi. Shuningdek, yuksak tezlikdagi reyd yakunida eng to‘g‘ri qarorni qabul qilishni ham. Vaqtining asosiy qismida Marmush bo‘shashib qolgandek ko‘rinsada, harakatga kelganida hech kim yeta olmaydi».
Kompanining e’tirofi statistik ma’lumotlar tasdiqlaydi. Sprint bobida Omar bundesligada 5, o‘rinda. Vaholanki, atigi 7 nafar futbolchi har bir o‘yinda Marmushdan (9,5 km.) kamroq yuguradilar. Ya’ni, Marmush kam yuguradi, tezlik olish bobida hammadan ustun. Kuch-quvvatini aql bilan sarflaydi.
Bundan tashqari, Omar monstrga xos ish hajmini bajaradi. 99-prosentil u bundesligadagi hujumchilarning 99 foizidan yaxshiroq to‘p surishini anglatadi. Biroq to‘p yo‘qotish bobida Marmush ligadagi eng yomon o‘yinchilar qatorida. Buning sababi, u doimo keskinlikni oshirish maqsadida tezkor driblingni qo‘llaydi, jarima maydonchasi ichida ham tezlikni pasaytirmaydi, zarbaga mos nuqtani yoki qulay vaziyatdagi jamoadoshini izlaydi Uning o‘zaro uchrashuvdagi 2}2 natijasi xususida «Kill» murabbiyi Marsel Rapp shunday degandi: «O‘yin rejasini tuzish evaziga Omarni zararsizlantirishning iloji yo‘q. Chunki uning qayerda ko‘proq paydo bo‘lishini aniqlab bo‘lmaydi. Shu sababli unga qarshi himoyalanish juda qiyin».
«Ayntraxt» bosh murabbiyi Dino Toppmellerning izohi quyidagicha: «Uning raqiblarga qarshi qo‘llaydigan shiddatli sur’ati va tezkorligini bartaraf etish oson emas. Yuqori tezlikda ham u to‘pni yo‘qotmaydi, yugurish chog‘ida ham aniq uzatmalarni yo‘llay oladi».
Raqiblar muammosi - faqat Marmush emas, sherigi Ekitik ham bor
Yugo Ekitik - 22 yoshli fransuz, «Ayntraxt» uni «PSJ»dan olgan. Yugo «Reyms»da yorqin o‘ynayotgandi, Messi, Neymar va Mbappelarga qiziqib, Parijga yo‘l oldi. Biroq Luis Enrikening ishonchini qozona olmadi.
O‘tgan mavsumning ikkinchi yarmida Marmush va Ekitik bir-birlariga moslashib olishdi va mavsumoldi yig‘inida Yevropaning ajoyib hujumkor duetini shakllantirishdi. Hozircha, juftlikning eng yaxshi ishtiroki (3:1) «Xoffenxaym»ga qarshi bahsda bo‘y ko‘rsatdi.
Omardagi barcha xislatlar Yugoga ham xos - tezkor, bo‘shliqda xavfli, qizg‘anchiq emas. Bo‘y borasida hatto ustun - 189 sm., Omarniki - 177.
Bir vaqtning o‘zida Marmush va Ekitikni «yopish» juda qiyin. Buning uchun to‘liq himoya uslubini qo‘llash 90 daqiqa ichida hushyorlikni yo‘qotmaslik talab etiladi. Yoki to‘pni ularga boy bermaslik. «Bavariya» 3ta xatoga yo‘l qo‘ydi va o‘sha zahoti jazolandi.
Marmushning salohiyatini oshirayotgan murabbiyga respekt
Misrlik shogirdining fazilatlarini yaxshi biladigan Dino Toppmeller uni yetakchilik muhitiga moslamoqda. Bu harakatlar samarasi hujumchining to‘pni olib yurishi va tig‘iz pressing ko‘rsatkichlaridan bilib olish mumkin.
«Ayntraxt» risoladagidek tarkibga ega. Lekin u «Bavariya», «Bayer», «Borussiya D.» va «RB Leypsig» tarkiblariga nisbatan ancha kamtar. Biroq Marmush, aniqrog‘i, hujumkor juftlik jamoani yetakchi to‘rtlik da’vogarlari safiga olib chiqishga qodir. Bizningcha, murabbiy Omar va Yugoning salohiyatini yuzaga chiqarib, boshqa shogirdlarini juftlikka moslashtira oladi.
A.AHMEDOV tayyorladi
