Boks bo‘yicha sobiq mutlaq jahon chempioni Mayk Tayson bloger Jeyk Polga qarshi jang o‘zi uchun muhim ekani, g‘alaba uchun u ringda o‘lishga ham tayyorligini bildirdi.

“Bu men uchun haqiqatan ham muhim jang. Agar g‘alaba qozonsam, o‘lmas jangchi bo‘laman. Agar yomon jang qilsam, kasalxonada yotib o‘lishni emas, ringda o‘lishni xohlayman. Men u bilan jang qilmoqchiman va uni yanchib tashlayman”, dedi Tayson YouTubeda e’lon qilingan jangning reklama roligida.

Ma’lumot uchun, jang dastlab 20 iyul kuni bo‘lib o‘tishi kerak edi, biroq may oyida Tayson Mayamidan Los-Anjelesga uchayotgan samolyotda o‘zini yomon his qilgan va unga tibbiy yordam ko‘rsatildi. Sobiq bokschi vakilining so‘zlariga ko‘ra, u qo‘nishga 30 daqiqa qolganida oshqozon yarasi ochilib ketgani bois unda ko‘ngil aynishi va bosh aylanishi boshlangan. Keyinchalik Most Valuable Promotions tashkiloti jangchilar uchun teng tayyorgarlik sharoitlarini ta’minlash uchun jang qoldirilgani ma’lum qildi.

Jang 15 noyabr kuni Texas shtatining Arlington shahrida bo‘lib o‘tadi.

27 yoshli Pol boksda 11 ta uchrashuv o‘tkazgan va janglarning faqat bittasida mag‘lubiyatga uchragan.

Tayson — 58 yoshda. Faoliyati davomida u 58 ta jang o‘tkazib, 50 ta g‘alaba (44 tasini nokaut bilan) qo‘lga kiritgan, 6 tasida mag‘lubiyat alamini totib ko‘rgan, ikkita jang haqiqiy emas deb topilgan. Tayson professional ringdagi so‘nggi jangini 2005 yil 11 iyunda o‘tkazdi va irlandiyalik bokschi Kevin Makbraydga yutqazdi.