"Inter" bosh murabbiyi Simone Indzagi "Napoli"ga qarshi A Seriyaning navbatdagi turidan o‘rin olgan uchrashuv haqida gapirdi.
Yakshanba kuni neapolliklarning g‘alabali seriyasi uzildi – Antonio Konte shogirdlari o‘z maydonida "Atalanta"ga mag‘lub bo‘ldi (0:3). Biroz vaqt o‘tgach, "Inter" raqibining ochko yo‘qotishdan unumli foydalanib, "Venesiya"ni mag‘lub etdi (1:0). Endi "neradzurrilar"ning peshqadam "Napoli"dan farqi atigi bir ochkoni tashkil etadi, kelasi yakshanba kuni esa jamoalar Milanda o‘zaro o‘yin o‘tkazishadi.
"Hal qiluvchi o‘yinmi? Yo‘q, bu o‘yin hal qiluvchi bo‘ladi deb o‘ylamayman. Ha, bu juda muhim o‘yin, lekin bundan oldin Yevropaning eng zo‘r jamoalaridan biri bo‘lgan "Arsenal" bilan to‘qnash kelishimiz kerak. Hozir bor e’tiborimni shu narsaga qaratganman", - deya Indzagidan iqtibos keltiradi Football Italia.
