"Интер" бош мураббийи Симоне Индзаги "Наполи"га қарши А Сериянинг навбатдаги туридан ўрин олган учрашув ҳақида гапирди.
Якшанба куни неаполликларнинг ғалабали серияси узилди – Антонио Конте шогирдлари ўз майдонида "Аталанта"га мағлуб бўлди (0:3). Бироз вақт ўтгач, "Интер" рақибининг очко йўқотишдан унумли фойдаланиб, "Венеция"ни мағлуб этди (1:0). Энди "нерадзуррилар"нинг пешқадам "Наполи"дан фарқи атиги бир очкони ташкил этади, келаси якшанба куни эса жамоалар Миланда ўзаро ўйин ўтказишади.
"Ҳал қилувчи ўйинми? Йўқ, бу ўйин ҳал қилувчи бўлади деб ўйламайман. Ҳа, бу жуда муҳим ўйин, лекин бундан олдин Европанинг энг зўр жамоаларидан бири бўлган "Арсенал" билан тўқнаш келишимиз керак. Ҳозир бор эътиборимни шу нарсага қаратганман", - дея Индзагидан иқтибос келтиради Football Italia.
