Turinning "Yuventus" klubi fransiyalik yarim himoyachi Pol Pogba bilan shartnomani bekor qilish borasida muzokaralar olib bordi.
Bu haqda Sky Sports xabar berdi.
Manbaga ko‘ra, tomonlar o‘rtasidagi muzokaralar ilg‘or bosqichda. Uning shartnomasi 2026 yilning yoziga qadar mo‘ljallangan.
Futbolchiga hozirdanoq turli jamoalar faol qiziqish bildirishmoqda. Gap Premyer-liga, Saudiya Arabistoni va Braziliya klublari haqida ketmoqda.
Eslatib o‘tamiz, Pogbaning doping uchun diskvalifikasiya muddati yaqinda to‘rt yildan 18 oyga qisqartirilgandi, 31 yoshli yarim himoyachi keyingi yilning mart oyida o‘yinga qaytishi mumkin. Shunga qaramay, "Yuventus" 2018 yilgi jahon chempioni bilan shartnomani bekor qilishni rejalashtirmoqda.
Pogba so‘nggi bor maydonga 2023 yil 3 sentyabr kuni rasmiy o‘yinda, A Seriya doirasida “Empoli”ga qarshi o‘yinda (“Yuventus” 2:0 hisobida g‘alaba qozongan) maydonga tushgan edi. Shundan so‘ng, tanada testosteron metabolitlari topilganligi ma’lum bo‘ldi.
