Superligada 25-tur ortda qoldi. «Metallurg» jamoasi bu tur «Surxon»ni qabul qildi va 1:0 hisobida g‘alaba qozondi. Bellashuvdan so‘ng jamoa murabbiyi Ilyos Qurbonov matbuot anjumanida ishtirok etdi.

— «Surxon» jamoasi nimalarga qodir ekanligini bilar edik. Ular chempionatdagi eng tartibli va hujumkor futbol o‘ynaydigan jamoa. Rejamiz ish berdi. Ertaroq vaziyatdan foydalanib hammasini hal qilishimiz ham mumkin edi. Bu ligada jon saqlab qolish uchun oxirgi imkoniyatimiz edi. Agar mag‘lub bo‘lganimizda, taqdirimiz hal bo‘lar edi. O‘tgan safar aytganimdek, jang oxirigacha bo‘ladi. Qarshida ham munosib harakat qilmoqchimiz.

— Kucherenko himoya va hujumda birdek harakat qildi?! Uning taqdiri nima bo‘ladi?

— U avvalgi o‘yinlarda ham mudofaa chizig‘ida yordam bergan edi. «Surxon» ko‘p holarda yuqori chiqib borgani bois, Kucheronkoga to‘pni raqib o‘zlashtirmasidan oldin yopishini so‘ragan edik. U berilgan vazifani mukammal bajardi. Uning biz bilan yana bir yillik shartnomasi bor. Hammasi o‘rnida bo‘lsa, bizga kelasi mavsumda ham yordam beradi.

— Yosovichning ahvoli qanday?

— Unda jarohat bor. 2 oydan beri davolanmoqda. Bizda hujum variantlari orasida qarshi hujumga mos tushadigan ijrochilarga e’tibor qaratdik.

— Sizning ishingizni ijobiy baholashmoqda. O‘zingizni qaysi uslubdagi murabbiy deb hisoblaysiz?

— Istalgan murabbiy tarkibida bor futbolchilardan kelib chiqib o‘yin quradi. Agar hujumkorlikni yaxshi ko‘radigan futbolchilar bo‘lsa, hujumkor futbol o‘ynaydi. Biz markazdagi ijrochilarimizga ishongan xolda, qarshi hujumda o‘ynashga harakat qilamiz. Yevropaga keladigan bo‘lsak, Gvardiolaning "Manchester Siti"si menga manzur keladi.

— Berdiyev "Neftchi" bilan o‘yindan keyin «Metallurg» bilan yoshlar bilan to‘p suramiz deb aytdi?!

— U inson bilan Qarshida 4 yil birga o‘ynaganmiz. "Nasaf" – chempion jamoa. Ularda ikkita bir xil tarkib bor. Xatto, yoshlari asosiy tarkibdagilardan ko‘proq ishtiyoqi bo‘ladi. Oson o‘yin bo‘lmaydi, biroq biz g‘alaba uchun chiqamiz.