Payshanba kuni FIFA rasmiy saytida terma jamoalar reytingi yangilandi. Ushbu reytingning kuchli beshligida hech qanday o‘zgarish bo‘lmadi. Argentina terma jamoasi sayyoramizning eng kuchli jamoasi maqomini saqlab qoldi (1867,25 ball). «Albiseleste» amaldagi jahon chempioni ekanligi ma’lum.

Keyingi o‘rinlarda Fransiya, Ispaniya, Angliya va Braziliya terma jamoalari.

Belgiya terma jamoasi Millatlar ligasidagi muvaffaqiyatsizliklardan so‘ng oltinchi o‘rindan sakkizinchi o‘ringa tushib ketdi. Portugaliya (oltinchi o‘rin) va Niderlandiya (ettinchi o‘rin) mos ravishda yuqoriga ko‘tarildi.

Italiya to‘qqizinchi o‘rinda, Germaniya esa kuchli o‘ntalikni yakunlab turibdi. Bundestim bir pog‘onaga ko‘tarildi - oktyabrda u o‘n birinchi o‘rinda edi.