Madridning "Real" klubi jamoa qanot hujumchisi Vinisius Juniorning FIFA talqiniga ko‘ra yilning eng yaxshi futbolchisi mukofotini qo‘lga kiritish imkoniyati yuqori ekanligini ta’kidlamoqda. Bu mukofot "Oltin to‘p" uchun ovoz berishda ikkinchi o‘rinni egallagan braziliyalik vinger uchun o‘ziga xos mukofot bo‘lishi mumkin deb hisoblanmoqda. Bu haqda AS nashri xabar berdi.

Manba ma’lumotlariga ko‘ra, "qaymoqranglilar" qarorgohida FIFAning "The Best" mukofoti "Oltin to‘p"ga nisbatan demokratikroq deb hisoblanadi, chunki ovoz berishda FIFA reytingidagi birinchi yuztalikka kiruvchi mamlakatlarning ixtisoslashgan jurnalistlari ishtirok etadi. Bu yil muxlislar, murabbiylar va milliy terma jamoalar sardorlari ham o‘z ovozlarini berishadi.

Ta’kidlanishicha, Vinisiusning o‘zi ham 2024 yilda FIFA tomonidan yilning eng yaxshi futbolchisi deb tan olinishiga ishonadi.