"Barselona" Xansi Flikning "Betis"ga qarshi o‘yinda chetlatilishini adolatsizlik deb hisoblaydi.

Kataloniya jamoasi bosh murabbiyi La Liga o‘yinining 66-daqiqasida (2:2) kataloniyaliklar darvozasiga belgilangan penalti borasida hakam bilan bahslashgani uchun qizil kartochka oldi.

O‘yin hisobotida qayd etilishicha, chetlatilishga Flikning qichqiriqlari, imo-ishoralari va hakam Alexandro Munis qaroriga norozilik bildirgani sabab bo‘lgan - bu epizod kamida ikkita o‘yin diskvalifikasiyasini talab qiladi. «Barselona» murabbiyning qizil kartochkasiga qarshi chiqish niyatida ekani xabar qilingandi.

Mundo Deportivo xabariga ko‘ra, "Barselona" Flikning chetlatilishini adolatsizlik deb hisoblaydi, chunki u Munis bilan bevosita aloqaga chiqmagan.

Nemis murabbiyi hakamni haqorat qilmaganini tasdiqladi va faqat uning qaroriga rozi emasligini bildirdi.

Qayd etilishicha, klub Flik diskvalifikasiya tufayli o‘tkazib yuborishi mumkin bo‘lgan “Leganes” va “Atletiko”ga qarshi o‘yinlarni muhim deb hisoblamoqda.

"Barselona" bosh murabbiy ushbu uchrashuvlarda jamoani boshqara olishiga umid qilmoqda.