"Vest Xem" hujumchisi Maykl Antonio bir necha kun oldin jiddiy yo‘l-transport hodisasiga uchradi. Futbolchi shikastlangan mashinadan taxminan 45 daqiqa olib chiqildi, shundan so‘ng vertolyotda kasalxonaga jo‘natildi. Antonioning hayoti xavf ostida emas, lekin u oyoqlaridan jiddiy jarohat olgan.
Mayklning tiklanishi uchun bir yil kerak bo‘lishi kutilmoqda. Ehtimol, futbolchi faoliyatini butunlay yakunlashiga to‘g‘ri keladi. Shu bilan birga, The Times nashrining yozishicha, "Vest Xem" Antonioni yangi shartnoma bilan qo‘llab-quvvatlashi mumkin. 34 yoshli futbolchining haftasiga 90 ming funt maosh oladigan amaldagi shartnomasi 2024/2025 yilgi mavsum oxirigacha amal qiladi.
