Taniqli nemis insayderi Kristian Falk "RB Leypsig" "PSJ"ning ijara asosida o‘ynayotgan niderlandiyalik yarim himoyachisi Xavi Simonsni doimiy ravishda o‘z safiga qo‘shib olmoqchiligi haqida xabar berdi.

Nemis klubi niderlandiyalik futbolchi uchun 50 million yevro taklif qilishga tayyor. Ammo parijliklar futbolchi uchun katta summa olishni istashmoqda.

"Leypsig" Xavi Simonsni doimiy ravishda jamoada saqlab qolishdan manfaatdor. "PSJ" uning xizmatlari uchun taxminan 80 million yevro olmoqchi, bu "Leypsig" uchun juda qimmat. Ular Simonsni boshqa klubga sotishsa, 50 million yevro, keyin yana 30 million yevro haqida o‘ylashayotganini eshitdim.

Qizig‘i shundaki, "Leypsig" hozirda "Liverpul"ning sobiq bosh murabbiyi Yurgen Kloppda yashirin qurolga ega bo‘lib, unga ishonish mumkin. U Red Bulldagi yangi vazifalarini 1 yanvardan boshlaydi va klub u Simonsni qolishga ko‘ndira olishiga umid qilmoqda", - deya xabar beradi Falk.

Avvalroq, OAVda Xavi Simons xizmatlariga "Liverpul" va "Arsenal" klublari qiziqish bildirayotgani haqida ma’lumotlar paydo bo‘lgandi.