Ayni kunlarda Albaniya poytaxti Tirana shahrida Islom birdamligi sport assosiasiyasi (ISSA)ning navbatdagi Sessiyasi bo‘lib o‘tmoqda. Unda kelasi yil o‘tkazilishi ko‘zda tutilgan Islom birdamligi o‘yinlarining mezbonligi va tashkilotning kelgusidagi faoliyatiga oid masalalar ko‘rib chiqilyapti. Mazkur tadbirda O‘zbekiston MOQ nomidan Xalqaro aloqalar departamenti direktori Kamoliddin Ergashev ham ishtirok etmoqda.
Yig‘ilishda Saudiya Arabistoni poytaxti Ar-Riyod kelasi yil Islom birdamligi o‘yinlariga mezbonlik qilishi rasman tasdiqlandi. Bo‘lajak musobaqa 7-21 noyabr kunlariga belgilangan. Uning dasturidan 13 ta Olimpiya, 4 ta noolimpiya, 3 ta Paralimpiya va 1 ta milliy sport turi o‘rin olgan. Dasturga ko‘ra, bugun xalqaro tashkilotning Ijroqo‘m yig‘ilishi va Bosh Assambleyasi o‘tkaziladi.
Eslatib o‘tamiz, so‘nggi Islom birdamligi o‘yinlari 2022 yil Turkiyaning Konya shahrida o‘tkazilgan bo‘lib, unda O‘zbekiston delegasiyasi 56 ta davlat orasida 51 ta oltin, 42 ta kumush va 65 ta bronza medallari bilan umumjamoa hisobida mezbonlardan so‘ng faxrli ikkinchi o‘rinni egallagan edi.
