O‘zbekiston Respublikasi Prezidentining 2023 yil 7 apreldagi «Ma’muriy islohotlar doirasida yoshlar siyosati va sport sohasida davlat boshqaruvini samarali tashkil qilish chora-tadbirlari to‘g‘risida»gi 114-son Qaroriga binoan har yili Olimpiya va Paralimpiya sport turlari bo‘yicha o‘smirlar, yoshlar va kattalar o‘rtasidagi jahon chempionatlarida sovrindor bo‘lgan sportchilar hamda ularni tayyorlagan murabbiylar bir martalik pul mukofotlari bilan taqdirlanishadi.
Tadbirda O‘zbekiston Respubilkasi Sport vazirining o‘rinbosari Shahrullo Mahmudov, MOQ Bosh kotibi Oybek Kasimov, Sport faxriylari kengashi raisi Bahodir Maxsitov, yosh sportchilarimiz hamda ularning ustozlari ishtirok etishdi. Marosim avvalida so‘z olgan rasmiylar o‘zbek sportining kelajagi bo‘lgan yoshlarimizni erishgan muvaffaqiyatlari bilan qutlab, ularga kattalar o‘rtasidagi dunyo birinchiliklari va Olimpiya o‘yinlarida ham shohsupaga ko‘tarilishlarini tilashdi.
Shundan so‘ng jahon chempionatlarida shohsupaga ko‘tarilgan 45 nafar sportchi va ularning murabbiylariga pul mukofotlarining sertifikatlari taqdim etildi. Prezident qaroriga muvofiq, oltin, kumush va bronza medali sohiblari mos ravishda 3500, 1750 va 875, ularni tayyorlagan trenerlar esa 2000, 1000 va 500 AQSH dollari miqdorida taqdirlanishdi.
